CII.

1316, März 15. Breslau.

Schiedsspruch des Officials und Domherrn Konrad von Breslau in der den streitigen Zehnten zu Winzenberg betreffenden Streitsache zu Gunsten des Klosters.

In nomine domini amen. Cum coram venerabili in Christo patre domino Henrico dei gratia Wrat. episcopo in causa, que vertitur inter religiosos viros, dominum . . abbatem de Camenz et conventum monasterii eiusdem, ex parte una, necnon dominum de Schyltperg, Zamborium, scultetum et rusticos de Winczmaricz super quibusdam fertonibus decimalibus ex parte altera orta esset materia questionis, predictus dominus episcopus diversis ecclesie sue negociis prepeditus nobis Conrado, doctori decretorum, canonico et officiali Wrat., eandem causam conmisit huius sub tenore: - No. XCVIII. - Qua conmissione nobis facta per predictum dominum Wrat. episcopum, frater Thilo de Camenz ordinis Cysterciensis sindicus et procurator . . abbatis et conventus monasterii eiusdem de Camenz procuratorio nomine eorundem libellum obtulit in hec verba in iudicio coram nobis: Coram vobis honorabili viro, domino Conrado canonico et officiali Wrat. iudice in hac causa specialiter a venerabili in Christo patre domino Heinrico Wrat. episcopo delegato, ego Tylo frater de Camenz ordinis Cist. sindicus et procurator abbatis et conventus monasterii eiusdem de Camenz procuratorio nomine eiusdem contra Ottonem Frisonem procuratorem domini Zamborii heredis de Winczmaricz, qui dominus Zamborius pro sculteto et rusticis ibidem de Winzmaricz nomine suo et nomine rusticorum litem periculo suo et rusticorum eorundem suscepit, propono, quod cum decima in fertonibus ad monasterium predictum in Camenz de quolibet manso de villa predicta Winzmaricz pertineat, in quorum fertonum decimalium possessione predictum monasterium fuit multis temporibus retroactis, scultetus tamen et rustici supradicti cum sex scotos solvere teneantur, nonnisi quatuor scotos dicunt se teneri, residuos scotos solvere rennuentes. Quare nomine, quo supra, peto, fertones decimales in predicta villa Winzmaricz monasterio predicto adiudicari ipsumque scultetum et rusticos ad solutionem fertonum decimalium predicto monasterio ex integro faciendam conpelli et conpellendos fore sententialiter decrevi; ipsosque ad restituendum fructus perceptos et qui percipi potuerint, quos estimo ad quinque marcas, sententialiter conpelli. Item peto expensas in lite factas et protestor de inposterum faciendis, iuris beneficio in omnibus michi salvo. Ad quem libellum magister Otto Friso procurator domini Zamborii de Schiltperg necnon sculteti et rusticorum suorum de Winczmaricz procuratorio nomine eorundem responsionem suam obtulit in hec verba: Coram vobis, domino Conrado, doctore decretorum canonico et officiali Wrat., ego Otto Friso procurator domini Zamborii de Schyltperg et rusticorum suorum de Winzmaricz ad petitionem fratrum de Camenz animo litem contestandi respondeo et nego, rusticos de Winczmaricz debere solvere nomine decime de quolibet manso parvo ultra quatuor scotos, quos solos ipsos dico solvere debere, et in quorum solutione dico ipsos defendi debere eo, quod ab eo tempore, cuius contrarii memoria non habetur, fuerunt in possessione vel quasi iuris talis, quod tantum quatuor scotos solvere debeant de quolibet parvo manso, unde dico petita fieri non debere.
Lite igitur inter partes legittime contestata prestitoque hincinde de calumpnie iuramento, datis articulis productisque testibus et eorum attestationibus publicatis, productis etiam instrumentis ab utraque parte, tandem conclusum in causa a partibus extitit hinc et inde. Sed quia predictus dominus episcopus Wrat. multis sue Wrat. ecclesie, ut asserit, negociis prepeditus infrascriptam commissionis litteram nobis sub minori suo sigillo destinavit huiusmodi sub tenore: - No. CI. - nos itaque auctoritate predictarum litterarum diligenter visis et auditis parcium iuribus, rationibus, probationibus et eis equa lance plenius discussis, deliberatione insuper nobiscum et cum peritis prehabita diligenti dei nomine invocato partibus propter hoc in nostra presencia constitutis et sententiam fieri postulantibus, diffinitive fertones decimales de quolibet manso in villa Winzmaricz adiudicamus predicto monasterio in Camenz in hiis scriptis ipsumque scultetum et rusticos in Wynczmaricz ad solutionem fertonum decimalium predicto monasterio faciendam ex integro sententialiter condempnamus, Ottonem Frisonem procuratorem nomine domini Zamborii de Sciltperg et ipsum Zamborium in expensis litis condempnantes, quos taxamus ad novem marcas, prout magister Johannes de Ratybor, procurator abbatis de Camenz et conventus monasterii eiusdem, substitutus per fratrem Thilonem de Camenz ord. Cist. tactis sacrosanctis ewangeliis in animas predictorum abbatis et conventus in Camenz suo deptisuit iuramento. Lata et lecta est sententia in consistorio Wrat. hora prime in presencia notarii infrascripti et testium subscriptorum, Ydus Martii anno domini Mo°. CCC°. XVI°. presentibus honorabilibus viris: dominis Cristano Wrat., Johanne filio Wyneri ecclesie sante Crucis in Wrat. canonicis; magistro Rudegero plebano in Strelin; magistris Nicolao de Ligenicz, Nycolao de Opol advocatis consistorii Wrat. et aliis fide dignis. In cuius rei testimonium presentem litteram sigillo nostri officiolatus (!) fecimus conmuniri.
Signum notarii.
Et ego Johannes quondam Heinrici de Aldenburg Mersburgensis diocesis auctoritate imperiali publicus notarius lationi dicte diffinitive sententie presens interfui et de mandato predicti domini Conradi officialis Wrat. iudicis a venerabili in Christo patre domini Henrico Wrat. episcopo in predicta causa delegati eam transscripsi et in publicam formam redegi meoque consueto signo et nomine consignavi.

Or. Perg. in duplo. Das S. des Officials in rothem W. bei A., in gewöhnlichem W. bei B., an Pergamentstreifen.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.